ភ្នំពេញ៖ រដ្ឋមន្ត្រីប្រតិភូអមនាយករដ្ឋមន្ត្រីលោក តាន់ ហ្សង់ហ្វ្រង់ស័រ បានលើកឡើងថាក្នុងជំនួបរវាងនាយករដ្ឋមន្ត្រីសម្ដេចធិបតី ហ៊ុន ម៉ាណែត ទៅវៀតណាម ភាគីវៀតណាមបានលើកឡើងពីក្ដីបារម្ភទាក់ទងនឹងគម្រោងព្រែកជីកដ៏ធំរបស់កម្ពុជាដែលថាអាចប៉ះពាល់ដល់ដៃទន្លេមេគង្គនៅក្នុងទឹកដីវៀតណាម។ ទោះជាយ៉ាងនាយករដ្ឋមន្ត្រីបានបញ្ជាក់ថាគម្រោងនេះនឹងប៉ះពាល់ដូចអ្វីដែលវៀតណាមលើកឡើងនោះទេ។

ថ្លែងក្នុងសន្នីសិទសារព័ត៌មាននៅយប់ថ្ងៃអង្គារ៍ ទី១២ ខែធ្នូ ឆ្នាំ២០២៣ បន្ទាប់ពីនាយករដ្ឋមន្ត្រីសម្ដេចធិបតី ហ៊ុន ម៉ាណែត បានត្រលប់ដល់កម្ពុជាវិញ លោក ហ្សង់ហ្វ័្រងស័រ បានលើកឡើ់ងថា ក្នុងជំនួបជាមួយសមភាគីវៀតណាមសម្ដេចធិបតី ហ៊ុន ម៉ាណែត បានបញ្ជាក់ថាការជីកព្រែកពីទន្លេបាសាក់កម្ពុជាឆ្ពោះទៅសមុទ្រក្នុងខេត្តកែបនេះមិនប៉ះពាល់ទៅលើបរិស្ថាននោះទេ។

លោកថា៖ «គម្រោងព្រែកជីកហ្វូណន់តេជោជាគម្រោងមួយសំខាន់ដែលសម្ដេចធិបតីបានបញ្ជាក់ទៅភាគីវៀតណាមថាគម្រោងនេះមិនបង្ករឱ្យមានផលប៉ះពាល់ជាអវិជ្ជមានដល់របបលំហូរទឹកទន្លេមេគង្គ និងទន្លេផ្សេងៗទៀត ទន្ទឹមនឹងនេះរក្សាបានូវស្ថេរិភាពបរិស្ថានអេកូឡូស៊ីនិងជម្រកធម្មជាតិសម្រាប់ជីវចម្រុះ។ ជារួមសម្ដេចធិបតីមើលឃើញថាសម្រាប់ប្រយោជន៍ពាណិជ្ជកម្មរបស់កម្ពុជាតទៅថ្ងៃមុខរយៈកាលខ្លីនិងមធ្យមវានឹងមិនបង្កបញ្ហាលំហូរទឹកនិងបរិស្ថានដល់វៀតណាមប្រទេសជិតខាងទេតាមការសិក្សាជាក់ស្ដែង»។

គួរឱ្យដឹងដែរថាកម្ពុជាមានគម្រោងក្នុងការជីកព្រែហ្វូណន់តេជោដែលមានប្រវែងប្រមាណ ១៨០គីឡូម៉ែត្រចេញពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីងនៃទន្លេបាសាក់ស្រុកកោះធំ និងបន្ទរហូតទៅដល់សមុទ្ទខេត្តកែប។ តាមតម្រាយផ្លូវនេះគឺរដ្ឋាភិបាលកម្ពុជាបានយកតម្រាយតាមផ្លូវទឹកចាស់ប៉ុណ្ណោះ។

គម្រោងសាងសង់នេះត្រូវប្រើប្រាស់ពេលប្រមាណ ៤ឆ្នាំ ដោយគ្រោងចាយលុយប្រមាណ ១ ៧០០លានដុល្លាអាមេរិក៕